【Emily】捐血世家三代同堂捐逾200包

【明報專訊】聽日就係中秋節，大家可能會同家人一齊食月餅賞月，有熱心家庭就選擇「捐血慶中秋」。香港紅十字會輸血服務中心噚日喺facebook分享，話有三代同堂家庭臨近中秋預約一齊捐血，三代人至今合共捐咗超過200包血。中心話，疫情反覆令血液收集量持續唔穩定，希望大家可以好似呢個家庭咁，中秋約埋家人一齊捐血救人，為需要接受輸血治療嘅傷病者提供痊癒同返屋企團圓嘅希望。